ວັນທີ 19 ພຶດສະພາ 2026 ຢູ່ທີ່ສະໂມສອນເມືອງລອງ ແຂວງຫຼວງນໍ້າທາ ໄດ້ຈັດກອງປະຊຸມເຜີຍແຜ່, ເຊື່ອມຊຶມ ເນື້ອໃນກອງປະຊຸມໃຫຍ່ຄັ້ງທີ XII ຂອງພັກປະຊາຊົນປະຕິວັດລາວ ຕິດພັນກັບເນື້ອໃນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຫຼວງນໍ້າທາ ໃຫ້ຄະນະພັກ, ຄະນະນຳ ແລະ ພະນັກງານຫຼັກແຫຼ່ງຂອງເມືອງລອງ, ໂດຍການເປັນປະທານ ຂອງທ່ານ ບູນທອນ ສີສະຫວັນ ກຳມະການປະຈໍາພັກແຂວງ ປະທານຄະນະກວດກາພັກ-ປະທານອົງການກວດກາລັດແຂວງ,ຫົວໜ້າອົງການຕ້ານການສໍ້ລາດຫວັງຫຼວງຂັ້ນແຂວງ ແລະ ຊີ້ນໍາເມືອງລອງ, ມີກໍາມະການພັກແຂວງ,ກຳມະການປະຈຳພັກເມືອງ, ກຳມະການພັກເມືອງ, ຂະແໜງການທີ່ກ່ຽວຂ້ອງຂັ້ນແຂວງ-ຂັ້ນເມືອງ,ຫົວໜ້າຫ້ອງການ-ຮອງຫົວໜ້າຫ້ອງການ, ສອງກອງບັນຊາການ ປກຊ-ປກສ,ອົງການທຽບເທົ່າ,ອາດິດການນໍາເມືອງ ແລະ ພະນັກງານຫຼັກແຫຼ່ງຂອງເມືອງ ເຂົ້າຮ່ວມ.
ກອງປະຊຸມໄດ້ຮັບຟັງການເຜີຍແຜ່ ໂຄງການການເມືອງຂອງພັກ ສະບັບທີ 3, ບົດລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ XII ຂອງພັກ, ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030), ເຜີຍແຜ່ ບົດລາຍງານການ ເມືອງ ຂອງຄະນະບໍລິຫານງານພັກແຂວງ ຄັ້ງທີ IX, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ແລະ ທິດທາງແຜນການ 5 ປີ ຄັ້ງທີ X (2026-20230) ຂອງແຂວງ ແລະ ມະຕິຕົກລົງ ສະບັບເລກທີ 29/ຄປພຂ, ລົງວັນທີ 27 ເມສາ 2026 ວ່າດ້ວຍການແບ່ງຄວາມຮັບຜິດຊອບ ໃຫ້ຄະນະບໍລິຫານງານພັກແຂວງ ສະ
ໄໝທີ IX. 
ທັງນີ້ກໍ່ເພື່ອໃຫ້ ຄະນະພັກ, ຄະນະນຳແຕ່ລະຂັ້ນ ແລະ ພະນັກງານຫຼັກແຫຼ່ງຂອງເມືອງ ຮັບຮູ້,ເຂົ້າໃຈເນື້ອໃນຈິດໃຈ ແລະ ທິດທາງແຜນການ ໜ້າທີ່ຈຸດສຸມທີ່ໄດ້ກຳນົດໄວ້ໃນມະຕິກອງປະຊຸມໃຫຍ່. ເພື່ອສ້າງຄວາມສາມັກຄີ ແລະ ຄວາມເປັນເອກະພາບສູງ ໃນການຈັດຕັ້ງປະຕິບັດໜ້າທີ່ການເມືອງ ເພື່ອພັດທະນາເສດຖະກິດ-ສັງຄົມ ຂອງແຂວງຫຼວງນ້ຳທາ ກໍ່ຄືເມືອງລອງ ໃຫ້ມີຄວາມເຂັ້ມແຂງ, ເປັນບາດກ້າວສຳຄັນໃນການຫັນປ່ຽນທາງດ້ານແນວຄິດ ແລະ ການກະທຳ ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາທ້ອງຖິ່ນໃຫ້ຈະເລີນຮຸ່ງເຮືອງຍີ່ງຂື້ນ.
ການເຜີຍແຜ່, ເຊື່ອມຊຶມ ເນື້ອໃນກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ ຕິດພັນກັບເນື້ອໃນ ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຫຼວງນໍ້າທາຄັ້ງນີ້ໄດ້ດໍາເນີນເປັນເວລາ 1 ວັນເຕີມ ແລະ ປິດລົງດ້ວຍຜົນສໍາເລັດຢ່າງຈົບງາມ.