ວັນທີ 16 ສິງຫາ 2024 ຢູ່ທີ່ສະໂມສອນແຂວງຫຼວງນໍ້າທາ ໄດ້ຈັດກອງປະຊຸມ ເພື່ອຮັບຟັງການເຜີຍແຜ່ທິດຊີ້ນໍາຂອງທ່ານ ປອ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ຮອງຫົວໜ້າອານຸກໍາມະການເນື້້ອໃນກອງປະຊຸມໃຫຍ່ ຄັ້ງທີ XII ຂອງພັກ ພ້ອມຄະນະທີ່ລົງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ຫຼວງນໍ້າທາ ໂດຍເປັນກຽດເຂົ້າຮ່ວມມີທ່ານ ຈັນທອງ ແກ້ວປະເສີດ ຮອງເລຂາພັກແຂວງ, ຜູ້ຊີ້ນໍາຂົງເຂດການເມືອງ-ແນວຄິດ, ພັກ-ພະນັກງານຂັ້ນແຂວງ, ມີການນໍາຂອງແຂວງ, ຕາງໜ້າສອງກໍາລັງປ້ອງກັນຊາດ-ປ້ອງກັນຄວາມສະຫງົບ, ຫົວໜ້າພະແນກການອ້ອມຂ້າງແຂວງ, ມີພະນັກງານ-ລັດຖະກອນຄະນະໂຄສະນາອົບຮົມແຂວງເຂົ້າຮ່ວມຢ່າງພ້ອມພຽງ.
ກອງປະຊຸມຍັງໄດ້ຮັບຟັງການລາຍງານໂດຍຫຍໍ້ວຽກງານທີ່ພົ້ນເດັ່ນໄລຍະ 6 ເດືອນຜ່ານມາຂອງແຂວງ ໂດຍທ່ານ ຮອງເລຂາພັກແຂວງ ໂດຍສະເພາະ ແມ່ນການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິຄໍາສັ່ງສະໄໝທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ XIII ຂອງອົງຄະນະພັກແຂວງ, ແຜນພັດທະນາເສດຖະກິດສັງຄົມ ປະຈໍາປີ 2023-2024 ໂດຍຕິດພັນກັບສອງວາລະແຫ່ງຊາດ, ການກະກຽມກອງປະຊຸມໃຫຍ່ 3 ຂັ້ນຂອງແຂວງ, ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກໃນໄລຍະຜ່ານມາເປັນຕົ້ນແມ່ນ: ຕົວແບບທາງດ້ານການຜະລິດກະສິກໍາ, ການຄຸ້ມຄອງບໍລິຫານລັດ, ການເກັບພາສີ-ອາກອນ, ແກ້ແກ້ໄຂຄວາມທຸກຍາກຢູ່ຮາກຖານ, ເມືອງ, ການພັດທະນາຄົມມະນາຄົມ ສາມາດມີເສັ້ນທາງເຂົ້າເຖິງເຂດຊົນນະບົດທຸລະກັນດານ, ພັດທະນາດ້ານການສຶກສາ, ສາທາລະນະສຸກໃຫ້ດີຂື້ນເທື່ອລະກ້າວ.
ໂອກາດດຽວກັນຍັງໄດ້ຮັບຟັງການເຜີຍແຜ່ບັນດານິຕິກຳຕ່າງໆກ່ຽວກັບການກະກຽມສະເຫຼີມສະຫຼອງ 3 ວັນປະຫັວດສາດໃນປີ 2025 ຄື: ວັນສ້າງຕັ້ງພັກ ຄົບຮອບ 70 ປີ, ວັນສະຖາປານາ ສປປ ລາວ ຄົບຮອບ 50 ປີ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 105 ປີ ແລະ ເຜີຍແຜ່ແນະນໍາກ່ຽວກັບການຊຸກຍູ້ບົດປະກອບຄໍາເຫັນຂອງບັນດາຕົວແທນຈາກແຂວງຕ່າງໆຕໍ່ກອງປະຊຸມໃຫຍ່ ຄັ້ງທີ XII ຂອງພັກໃຫ້ບັນດາທ່ານການນໍາຂອງແຂວງກຳໄດ້ເພື່ອນໍາໄປຈັດຕັ່ງປະຕິບັດເຜີຍແຜ່ແນະນໍາກ່ຽວກັບການກະກຽມຊຸກຍູ້ ໃນການກະກຽມກອງປະຊຸມໃຫຍ່ 3 ຂັ້ນ ຂອງແຂວງ.
ໃນຕອນທ້າຍຂອງກອງປະຊຸມທ່ານ ປອ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ຮອງຫົວໜ້າອານຸກໍາມະການເນື້້ອໃນກອງປະຊຸມໃຫຍ່ ຄັ້ງທີ XII ຂອງພັກ ໄດ້ເນັ້ນໜັກກ່ຽວກັບການກະກຽມກອງປະຊຸມໃຫຍ່ 3 ຂັ້ນຂອງພັກ ແລະ ການກະກຽນສະເຫຼີມສະຫຼອງ 3 ວັນປະຫວັດສາດ ໃຫ້ສຸມໃສ່ ປຶກສາຫາລື, ແບ່ງຄວາມຮັບຜິດຊອບຢ່າງລະອຽດແຕ່ລະໜ້າວຽກ, ມອບໃຫ້ແຕ່ລະພາກສ່ວນມີຮັບຜິດຊອບລະອຽດ, ຈະແຈ້ງ, ແຕ່ງຕັ້ງຄະນະຮັບຜິດຊອບຂັ້ນແຂວງ ເພື່ອຮັບຜິດຊອບໂດຍກົງ ແລະ ພ້ອມກັນຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ໃຫ້ມີຜົນສໍາເລັດ ແລະ ທັນກັບກໍານົດເວລາ, ການຈັດຕັ້ງປະຕິບັດການກະກຽມສະເຫຼີມສະຫຼອງຕ້ອງຕິດພັນກັບການກະກຽມກອງປະຊຸມ 3 ຂັ້ນໃຫ້ມີຂະບວນຟົດຟື້ນ, ມີບັນຍາກາດ, ການສະເຫຼີມສະຫຼອງຕ້ອງບົນຈິດໃຈປະຢັດມັດທະຍັດ ແລະ ເອົາໃຈໃສ່ຄົ້ນຄ້ວາເອົາບຸກຄະລາກອນຜູ້ທີ່ເໜາະສົມໃຫ້ໄດ້ຕາມເປົ້າໝາຍ ເພື່ອຮັບປະກັນໃຫ້ແກ່ກອງປະຊຸມໃຫຍ່ ຄັ້ງທີ XII ຂອງພັກ ໄດ້ຮັບຜົນສໍາເລັດຢ່າງຈົບງາມ.