ວັນທີ 02 ທັນວາ 2024 ແຂວງຫຼວງນໍ້າທາໄດ້ຈັດພິທີປາຖະກະຖາ ວັນສະຖາປານາ ສປປ ລາວ ຄົບຮອບ 49 ປີ ( 2/12/1975-2/12/2024) ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ( 13/12/1920-13/12/2024 ). ໃນພິທີທີ່ມີຄວາມໝາຍຄວາມສໍາຄັນນີ້ ການນໍາຂອງແຂວງຫຼວງນໍ້າທາ ໄດ້ເຂົ້າວາງກະຕ່າດອກໄມ້ຢູ່ທີ່ອານຸສາວະລີ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ແລະ ວາງພວງມາລາ ຢູ່ທີ່ອານຸສາວະລີນັກຮົບນິລະນາມຂອງແຂວງ ເພື່ອລະນຶກເຖິງຄຸນງາມຄວາມດີຂອງວິລະບູລຸດທີ່ກ້າແກ່ນທີ່ເສຍສະຫຼະຊີວິດເພື່ອປະເທດຊາດ ກໍ່ຄືປະຊາຊົນລາວບັນດາເຜົ່າ ແລະ ໄດ້ໂຮມຊຸມນຸມຈັດພິທີປາຖະກະຖາຢູ່ທີ່ຫໍວັດທະນະທຳແຂວງ ໂດຍການເຂົ້າ ຮ່ວມຂອງທ່ານຮອງເລຂາພັກແຂວງ, ທ່ານ ຮອງເຈົ້າແຂວງ, ຄະນະປະຈຳພັກແຂວງ, ກຳມະການພັກແຂວງ ແລະ ຫົວໜ້າພະແນກການອ້ອມຂ້າງແຂວງ, ມີອາດີດການນຳຂອງແຂວງ, ບັນດາທ່ານພະນັກງານປະຕິວັດອາວຸໂສບຳນານ, ຄະນະພັກ 2 ກອງບັນຊາການ, ຄະນະເລຂາທິການສະພາປະຊາຊົນແຂວງ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ອົງການທຽບເທົ່າ, ອຳນວຍການໂຮງຮຽນ, ໂຮງໝໍ, ລັດວິສາຫະກິດ, ບັນດາສາຂາທະນາຄານປະຈຳແຂວງ, ອົງການຈັດຕັ້ງ 8 ບ້ານເທດສະບານແຂວງ, ພະນັກງານ-ລັດຖະກອນ ແລະ ນ້ອງນັກຮຽນພາຍໃນແຂວງເຂົ້າຮ່ວມທັງໝົດ 594 ຄົນ, ຍິງ 247 ຄົນ.
ໃນພິທີດັ່ງກ່າວ ທ່ານຈັນທອງ ແກ້ວປະເສີດ, ຮອງເລຂາພັກແຂວງ, ຜູ້ຊີ້ນໍາຂົງເຂດວຽກງານການເມືອງ-ແນວຄິດ, ພັກ-ພະນັກງານຂັ້ນແຂວງ ໄດ້ຂຶ້ນປາຖະກະຖາ ວັນສະຖາປານາ ສປປ ລາວ ຄົບຮອບ 49 ປີ, ເຊິ່ງທ່ານໄດ້ຫວນຄືນມູນເຊື້ອ ປະຫວັດສາດອັນສະຫງ່າອົງອາດກ້າຫານຂອງບັນພະບູລຸດ ແລະ ພາຍໃຕ້ການຊີ້ນໍາ-ນຳພາຂອງພັກປະຊາຊົນປະຕິວັດລາວ, ຄວາມສາມັກຄີຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງຂອງພວກລ່າເມືອງຂື້ນແບບເກົ່າ, ແບບໃໝ່ສາມາດປົດປ່ອຍປະເທດຊາດຢ່າງມີໄຊ, ປະກາດສ້າງຕັ້ງ ສປປ ລາວ ຂື້ນຢ່າງສະຫງ່າຜ່າເຜີຍໃນວັນທີ 2 ທັນວາ ປີ 1975.
ໂອກາດດຽວກັນ ທ່ານ ພົຕ ຈັນສະແຫວງ ທິບຄຸນທອງ ຮອງເລຂາພັກແຂວງ ປະທານກວດກາພັກ-ອົງການກວດກາລັດ ກໍ່ໄດ້ຫວນຄືນມູນເຊື້ອຊີວິດການເປັນຢູ່ຂອງ ປະທານ ໄກສອນ ພົມວິຫານ ເຊີ່ງທ່ານໄດ້ເຂົ້າຮ່ວມເຄື່ອນໄຫວການປະຕິວັດຕັ້ງແຕ່ເຍົາໄວ ແລະ ໄດ້ຜ່ານຜ່າການຕໍ່ສູ້ກູ້ຊາດອັນລະອິດລະອ້ຽວຫຼາຍລົບຫຼາຍຕ່າວ ໄດ້ກ້າວເດີນບົນເສັ້ນທາງອັນສະຫວ່າງສະໄຫວຂອງການປະຕິວັດ ຕາມລັດທິມາກ-ເລນິນ ດ້ວຍຄວາມເຊື່ອໝັ້ນອັນ
ໜັກແໜ້ນ, ດ້ວຍມານະຈິດອັນແນວແນ່ ໂດຍບໍ່ຫວັນໄຫວຄອນແຄນຕໍ່ສິ່ງທ້າທາຍທົດສອບໃດໆ ແລະ ບໍ່ທໍ້ຖອຍຍອມຈໍານົນຕໍ່ຄວາມຫຍຸ້ງຍາກ ແລະ ໄພຂົ່ມຂູ່ໃດໆທັງສິ້ນ ຈົນໄດ້ຮັບໄຊຊະນະເປັນກ້າວໆມາ.
