ຕອນເຊົ້າຂອງວັນທີ 5 ທັນວາ 2024, ຢູ່ທີ່ຫ້ອງປະຊຸມຂອງຄະນະໂຄສະນາອົບຮົມແຂວງຫຼວງນໍ້າທາ ຊັ້ນ 4 ໄດ້ເປີດກອງປະຊຸມປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ປະຈໍາປີ 2024. ໂດຍໃຫ້ກຽດເຂົ້າຮ່ວມເປັນປະທານ ຂອງທ່ານ ຈັນທອງ ແກ້ວປະເສີດ ຮອງເລຂາພັກແຂວງ,ຜູ້ຊີ້ນໍາຂົງເຂດວຽກງານການເມືອງ-ແນວຄິດ, ພັກ-ພະນັກງານຂັ້ນແຂວງ ມີທ່ານ ຫົວໜ້າ-ຮອງຫົວໜ້າ, ຫົວໜ້າຂະແໜງ-ຮອງຫົວໜ້າຂະແໜງ ແລະ ພະນັກງານພາຍໃນຄະນະໂຄສະນາອົບຮົມແຂວງເຂົ້າຮ່ວມທັງໝົດ 20 ທ່ານ, ຍິງ 7ທ່ານ.
ໃນພີທີດັ່ງກ່າວ ທ່ານ ສິງໄຊ ວັນຄໍາ ກໍາມະການພັກແຂວງ ຫົວໜ້າຄະນະໂຄສະນາອົບຮົມແຂວງຂຶ້ນກ່າວເປີດກອງປະຊຸມການປະເມີນຜົນການປະຕິບັດວຽກງານຂອງພະນັກງານ – ລັດຖະກອນ ປະຈໍາປີ 2024.ທ່ານໄດ້ແນະນໍາເນື້ອໃນການປະເມີນໃຫ້ມີປະສິດທິພາບ ແລະ ປະສິດທິຜົນ, ການປະເມີນຕົນເອງ ແລະ ໄດ້ຄະແນນລວມໝູ່ຕ້ອງເບິງຕາມສະພາບຄວາມເປັນຈິງໂດນອີງໃສ່ 3 ເນື້ອໃນມາດຖານວັດແທກຄື: ດ້ານຄຸນທາດການເມືອງ ແລະ ຄຸນສົມບັດສິນທໍາປະຕິວັດ, ດ້ານຄວາມຮູ້, ຄວາມສາມາດ ແລະ ປະສົບການ ແລະ ດ້ານຜົນສໍາເລັດໃນການຈັດຕັ້ງປະຕິບັດໜ້າທີ່ວຽກງານ.
ທ່ານຄໍາຫຼ້າ ຈັນທະວີໄລ ຫົວໜ້າຂະແໜງ ຫ້ອງການບໍລິຫານ ຂື້ນຜ່ານດຳເລັດ ນາຍຍົກລັດຖະມົນຕີ ສະບັບເລກທີ 300/ລບ, ລົງວັນທີ 13/9/2017 ເພື່ອເປັນບ່ອນອີງໃນການຈັດຕັ້ງປະຕິບັດການປະເມີນ, ເຮັດໃຫ້ວຽກງານການປະເມີນໄດ້ດຳເນີນໄປຢ່າງເປັນລະບົບ, ຖືກຕ້ອງສອດຄ່ອງກັບຄວາມເປັນຈິງ ຫຼັງຈາກນັ້ນ ທ່ານ ຫົວໜ້າ-ຮອງຫົວໜ້າ, ຫົວໜ້າຂະແໜງ-ຮອງຫົວໜ້າຂະແໜງ ແລະ ພະນັກງານພາຍໃນຄະນະໂຄສະນາອົບຮົມແຂວງແຕ່ລະທ່ານກໍ່ໄດ້ຂື້ນຜ່ານໃບເກັບກ່ຽວຜົນງານໃນໄລຍະ 1 ປີ ຜ່ານມາ ເຊິ່ງໄດ້ຍົກໃຫ້ເຫັນດ້ານດີ-ຜົນສໍາເລັດ, ດ້ານອ່ອນ, ຂໍ້ຄົງຄ້າງ ແລະ ວິທີແກ້ໄຂໃນຕໍ່ໜ້າ ພ້ອມທັງໃຫ້ຄະແນນຕົນເອງ ຈາກນັ້ນກໍ່ໄດ້ພ້ອມກັນປະກອບຄຳຄິດເຫັນ ກໍ່ສ້າງຊ່ວຍເຫຼືອເຊິ່ງກັນ ແລະ ກັນ, ເພື່ອເສີມຂະຫຍາຍຈຸດດີ ປັບປຸງຈຸດອ່ອນ ແລະ ຂໍ້ຄົງຄ້າງ ດ້ວຍບັນຍາກາດຟົດຟຶ້ນ.
ໃນຕອນທ້າຍ ຍັງໄດ້ຮັບຟັງການໂອ້ລົມຈາກທ່ານປະທານ ກອງປະຊຸມ ເຊິ່ງທ່ານໄດ້ເນັ້ນໜັກຫຼາຍບັນຫາ ເພື່ອເຮັດໃຫ້ພະນັກງານ-ລັດຖະກອນພາຍໃນຄະນະໂຄສະນາອົບຮົມແຂວງທັງໜົດຈະຕ້ອງໄດ້ບຸກບືນສູ້ຊົນ ເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າພ້ອມທັງປັບປຸງແກ້ໄຂຂໍ້ຄົງຄ້າງໃຫ້ດີຂື້ນເປັນກ້າວ ໃຫ້ສອດຄ່ອງກັບສະພາບຄວາມເປັນຈິງ ແລະ ເພີ່ມທະວີນໍາພາອົງການທີ່ເປັນເສນາທິການທາງດ້ານການເມືອງ-ແນວຄິດ ໃຫ້ແກ່ຄະນະພັກຂັ້ນເທິງ ແລະ ເປັນເຈົ້າການໃນການໂຄສະນາເຜີຍແຜ່ວຽກງານການເມືອງ-ແນວຄິດ ໃນແຕ່ລະໄລຍະໃຫ້ທ່ວງທັນກັບເວລາ; ຕອນທ້າຍຂອງກອງປະຊຸມໄດ້ແຈກຢາຍໃບລົງຄະແນນໃຫ້ຫົວໜ້າ-ຮອງຫົວໜ້າ ແລະ ຫົວໜ້າຂະແໜງ-ຮອງຂະແໜງ ແລະ ພະນັກງານພາຍໃນຫ້ອງການໃຫ້ຄະແນນແຕ່ລະທ່ານ. ກອງປະຊຸມໄດ້ດໍາເນີນມາເປັນເວລາ 1 ຕອນ ແລະ ໄດ້ປິດກອງປະຊຸມຢ່າງເປັນທາງການ.