ຕອນເຊົ້າ ວັນທີ 15 ຕຸລາ 2024 ກົມຂໍ້ມູນຂ່າວສານ ແລະ ຝຶກອົບຮົມ ໄດ້ເປີດກອງປະຊຸມສ່ອງແສງລາຍງານວຽກງານໂຄສະນາຜ່ານສຶ່ເອເລັກໂຕຼນິກ (ເວັບໄຊສ໌) ປະຈໍາໄຕມາດ III ແລະ ທິດທາງແຜນການປະຈໍາໄຕມາດ IV ປະຈໍາປີ 2024 ຮ່ວມກັບຄະນະໂຄສະນາອົບຮົມແຂວງທົ່ວປະເທດ ຜ່ານລະບົບກອງປະຊຸມທາງໄກ Video conference ພາຍໃຕ້ການເປັນປະທານຂອງ ທ່ານ ວັນຕຸລາ ຣັກນຸດ ຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ເຂົ້າຮ່ວມ ມີ: ຄະນະຮັບຜິດຊອບຂັ້ນສູນກາງ, ມີບັນດາ ທ່ານຮອງຫົວໜ້າຄະນະໂຄສະນາອົບຮົມແຂວງ, ຜູ້ຊີ້ນໍາວຽກງານເວັບໄຊສ໌ ແລະ ແອັດມິ້ນບັນດາແຂວງທົ່ວປະເທດເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ ທ່ານ ວັນຕຸລາ ຣັກນຸດ ຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ໄດ້ກ່າວເປີດກອງປະຊຸມຢ່າງເປັນທາງການ ແລະ ໄດ້ສະເໜີໃຫ້ແອັດມິີ້ນຄະນະໂຄສະນາອົບຮົມແຕ່ລະແຂວງສ່ອງແສງລາຍງານສະພາບລວມໃນການເຄື່ອນໄຫວວຽກງານໂຄສະນາຜ່ານສື່ເອເລັກໂຕຣນິກ (ເວັບໄຊສ໌) ປະຈໍາໄຕມາດ III ແລະ ທິດທາງແຜນການປະຈໍາໄຕມາດ IV ປະຈໍາປີ 2024 ເພື່ອແນ່ໃສ່ເຮັດໃຫ້ການເຄື່ອນໄຫວປະຕິບັດວຽກງານໂຄສະນາຜ່ານສື່ເອເລັກໂຕຼນິກ (ເວັບໄຊສ໌) ຂອງຄະນະໂຄສະນາອົບຮົມແຂວງໃນທົ່ວປະເທດກາຍເປັນເສນາທິການໃນການໂຄສະນາເຜີຍແຜ່ແນວທາງຂອງພັກ, ມະຕິ, ຄໍາສັ່ງຂອງລັດແຕ່ລະໄລຍະ ແລະ ທັງສະໜອງຂໍ້ມູນຂ່າວສານທີ່ສໍາຄັນໃຫ້ແກ່ການນໍາຂັ້ນແຂວງ, ຂັ້ນເມືອງຂອງຕົນ ໃຫ້ມີຄວາມວ່ອງໄວທັນກັບສະພາບການ ສາມາດຕອບສະໜອງຄວາມຮຽກຮ້ອງຕ້ອງການ ຂອງໜ້າທີ່ວຽກງານການເມືອງໃນໄລຍະໃໝ່, ເວົ້າສະເພາະກໍແມ່ນພາຍຫຼັງໄດ້ຜ່ານຝຶກອົບຮົມການນຳໃຊ້ ເວັບໄຊສ໌ໃນເວີຊັນໃໝ່ຈົ່ງພ້ອມກັນປະດິດສ້າງສິ່ງໃໝ່ດ້ວຍຫຼາຍຮູບ, ຫຼາຍສີ ເພື່ອໃຫ້ຜູ້ບໍລິໂພກຂ່າວສານໄດ້ມີຄວາມດຶງດູດໜ້າອ່ານ ໜ້າສົນໃຈໃຫ້ຫຼາຍຂຶ້ນກ່ວາເກົ່າ.
ໃນວາລະກອງປະຊຸມໄດ້ຮັບຟັງການລາຍງານການເຄື່ອນໄຫວການຈັດຕັ້ງປະຕິບັດວຽກງານໂຄສະນາຜ່ານສື່ ( ເວັບໄຊສ໌) ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຂອງບັນດາຄະນະໂຄສະນາອົບຮົມແຂວງ ທົ່ວປະເທດດ້ວຍບັນຍາກາດຟົດຟື້້ນ; ຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຂອງທ່ານ ວັນຕຸລາ ຣັກນຸດ ຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວວຽກງານໂຄສະນາຜ່ານສື່ (ເວັບໄຊສ໌) ຂອງຄະນະໂຄສະນາອົບຮົມແຂວງໃນໄລຍະຜ່ານມາ ເຊິ່ງຫຼາຍແຂວງທາງພາກເໜືອ ນັບທັງສູນກາງໄດ້ປະເຊີນກັບຜົນກະທົບຈາກໄພທຳມະຊາດຢ່າງຮ້າຍແຮງ ແຕ່ເຖິງວ່າຈະມີຄວາມຫຍຸ້ງຍາກປານໃດກໍ່ຕາມແຕ່ຄະນະຮັບຜິດຊອບເວັບໄຊສ໌ ຄອຮ.ຂ ແອັດມິນບັນດາແຂວງກໍ່ຍັງສືບຕໍ່ຈັດຕັ້ງປະຕິບັດວຽກງານຂອງຕົນດ້ວຍຄວາມເອົາໃຈໃສ່ສະແດງອອກໃນການກະຈາຍຂ່າວຕ່າງໆໂຄສະນາຜ່ານສື່ເອເລັກໂຕຣນິກຢ່າງເປັນປົກກະຕິ ແລະ ເພື່ອເຮັດໃຫ້ວຽກງານເວັບໄຊສ໌ ໄດ້ເຄື່ອນໄຫວຢ່າງປົກກະຕິຕ້ອງໄດ້ເອົາໃຈໃສ່ບາງບັນຫາດັ່ງນີ້:
- ສືບຕໍ່ຍົກສູງຄຸນນະພາບດ້ານເນື້ອໃນເປັນຕົ້ນແມ່ນການຂຽນບົດຂ່າວ, ບົດຄວາມ, ສາລະໜ້າຮູ້ບັນດາແອັດມິ້ນຕ້ອງໄດ້ຝຶກຝົນຕົນເອງ ຕັ້ງໜ້າຕິດຕາມຂ່າວສານຈາກຫຼາຍໆແຫຼ່ງ ຊອກຮູ້ຊອກອ່ານ, ຄະນະບັນນາທິການກໍ່ຕ້ອງໄດ້ໃຫ້ທິດທາງ ເພື່ອກໍ່ສ້າງເປັນລຸ້ນສືບທອດ ປັດຈຸບັນທາງສູນກາງພວກເຮົາກໍ່ມີແຜນການທີ່ຈະຈັດຝຶກອົບຮົມກ່ຽວກັບວິທີການຂຽນບົດຕ່າງໆລົງສື່ອອນລາຍ ເຊິ່ງຄາດວ່າຈະຈັດຂື້ນໃນໄວໆນີ້.
- ເອົາໃຈໃສ່ກໍາແໜ້ນບັນດາເນື້ອໃນຂອງ ບົດຂ່າວ, ບົດຄວາມ, ເອກະສານຕ່າງໆ, ສາລະໜ້າຮູ້ ແລະ ອື່ນໆ ໃຫ້ມີຫຼາກຫຼາຍຂື້ນກວ່າເກົ່າ ເພີ່ມທະວີການຊອກຮູ້ບັນດາຂໍ້ມູນທີ່ເປັນປະໂຫຍດ ໃຫມີວາລະມີແຜນການເພື່ອການຈັດຕັ້ງປະຕິບັດໃຫ້ກຳໄດ້ຈື່ງຈະສາມາດຍາດໄດ້ຜົນສຳເລັດໃນໜ້າທີ່ວຽກງານຂອງຕົນເວົ້າລວມເວົ້າສະເພາະຂອງຄະນະໂຄສະນາອົບຮົມແຂວງ ໃນໄຕມາດຕໍ່ໄປນີ້ ກະກຽມຄວາມພ້ອມ ແລະ ມີແຜນການ ແນວໃດໃນການໂຄສະນາເຜີຍແຜ່ວັນສຳຄັນທີ່ຈະມາເຖິງໃນທ້າຍປີນີ້ ຈະມີຮູບການໂຄສະນາແບບໃດ, ກະກຽມເນື້ອໃນໄວ້ແນວໃດ ມີແຜນລະອຽດຄືແນວໃດ ແຜນການຮູບການໂຄສະນາແບບໃດ ແຕ່ໂດຍລວມແລ້ວຂ້າພະເຈົ້າກໍ່ມີຄວາມເຊື່ອໝັ້ນບັນດາສະຫາຍຄະນະນຳ ແລະ ບັນດາແອັດມິນໃນການເຮັດບົດບາດຂອງພວກເຮົາໃນຖານະທີ່ເປັນຜູ້ເຮັດວຽກງານໂຄສະນາປຸກລະດົມຂະບວນການດັ່ງກ່າວ. ( ການສະເຫຼີມສະຫຼອງ 3 ວັນປະຫວັດສາດ ຄື:ວັນສ້າງຕັ້ງພັກຄົບຮອບ70 ປີ, ວັນສະຖາປະນາ ສ ປປ ລາວຄົບຮອບ 50 ປີ ແລະ ວັນເກີດປະທານ ໄກສອນ ຄົບຮອບ 105 ປີ ໃນປີ 2025 ຈະມາເຖິງນີ້. )
3. ເພີ່ມທະວີການຍາດແຍ່ງເອົາການຊ່ວຍເຫຼືອ ທາງດ້ານທຶນຮອນ ແລະ ອຸປະກອນຮັບໃຊ້ຈາກຄະນະນໍາຂອງແຂວງ ກ່ອນອື່ນໝົດແມ່ນການສະໜອງກ່ຽວກັບລະບົບອິນເຕີເນັດໃນຄວາມໄວທີ່ເໝາະສົມໃຫ້ແທດເໝາະກັບສະພາບຂອງແຕ່ລະທ້ອງຖິ່ນ ແຕ່ຍ້ອນຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ພວກສະຫາຍຕ້ອງເປັນເຈົ້າການ ມີແຜນການລະອຽດນຳສະເໜີ ຊີ້ແຈ້ງບັນຫາ ໂດຍອີງໃສ່ການຈັດຕັ້ງປະຕິບັດໂຄສະນາເຜີຍແຜ່ທາງສື່ເອເລັກໂຕຣນິກ ເຊິ່ງຢູ່ເວັບໄຊຄະນະໂຄສະນາອົບຮົມແຂວງກໍ່ມີຄໍລຳການເຄື່ອນໄຫວຂອງຄະນະນຳຂັ້ນແຂວງ ແລະ ເມືອງ ເພື່ອອຳນວຍຄວາມສະດວກໃນການປະຕິບັດໜ້າທີ່ວຽກງານຂອງພັກ ແລະ ກອງປະຊຸມໄດ້ປິດລົງໃນຕອນດຽວກັນດ້ວຍຜົນສໍາເລັດອັນຈົບງາມ. 