ວັນທີ 11 ມີຖຸນາ 2024 ຄະນະໂຄສະນາອົບຮົມເມືອງຫລວງນໍ້າທາ ສົມທົບກັບ ຄະນະໂຄສະນາອົບຮົມແຂວງຫຼວງນໍ້າທາ ເປີດກອງປະຊຸມຖອດຖອນບົດຮຽນວຽກງານໂຄສະນາອົບຮົມທົ່ວແຂວງຫລວງນໍ້າ ຄັ້ງທີ V ຂື້ນທີ່ສະໂມສອນຂອງເມືອງ ພາຍໃຕ້ການເປັນປະທານຮ່ວມຂອງ ທ່ານ ສິງໄຊ ວັນຄໍາ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ແລະ ທ່ານ ຄຳຫຼ້າ ແຫຼ່ງໄຊຍະທໍາ ຮອງເລຂາພັກເມືອງ, ຜູ້ຊີ້ນໍາຂົງເຂດການເມືອງ-ແນວຄິດ, ພັກ-ພະນັກງານ, ມີຮອງຫົວຫນ້າຄະນະໂຄສະນາອົບຮົມແຂວງ ແລະ ຄະນະໂຄສະນາອົບຮົມ 5 ເມືອງ ຕະຫຼອດຮອດພະນັກງານວິຊາການຈາກຄະນະໂຄສະນາອົບຮົມແຂວງ ແລະ 5 ເມືອງເຂົ້າຮ່ວມທັງໝົດ 47 ສະຫາຍ, ຍິງ 17 ສະຫາຍ.
ໃນພິທີດັ່ງກ່າວ ທ່ານ ຄຳຫຼ້າ ແຫຼ່ງໄຊຍະທໍາ ຮອງເລຂາພັກເມືອງ, ຜູ້ຊີ້ນໍາຂົງເຂດການເມືອງ-ແນວຄິດ, ພັກພະນັກງານ ໄດ້ກ່າວເປີດກອງປະຊຸມຢ່າງເປັນທາງການ ພ້ອມທັງເໜັ້ນໜັກ ໃຫ້ບັນດາເມືອງສຸມສະຕິປັນຍາ ແລະ ພ້ອມກັນຄົ້ນຄ້ວາ, ປຶກສາຫາລື ປະກອບຄຳຄິດຄຳເຫັນແລກປ່ຽນບົດຮຽນ ຕໍ່ກອງປະຊຸມ ໃນຄັ້ງນີ້ ດ້ວຍຄວາມຮັບຜິດຊອບສູງ ແລະ ພ້ອມກັນປະຕິບັດຕາມວາລະດໍາເນີນກອງປະຊຸມໃຫ້ເຂັ້ມງວດ ເພື່ອເຮັດໃຫ້ກອງປະຊຸມຖອດຖອນບົດຮຽນໃນຄັ້ງນີ້ ມີຜົນສໍາເລັດຕາມລະດັບຄາດໝາຍທີ່ວາງໄວ້. ກອງປະຊຸມດຳເນີນໄປເປັນເວລາ 1 ວັນ.