ພິທີມອບ-ຮັບໜ້າທີ່ລະຫວ່າງຫົວໜ້າຄະນະໂຄສະນາອົບຮົມເມືອງສິງ ຜູ້ເກົ່າ ແລະ ຜູ້ໃໝ່.

ລາຍລະອຽດ

ສ້າງຂື້ນເມື່ອ ວັນອັງຄານ, 24 ຕຸລາ 2023 02:16

ຂຽນໂດຍ ຄອຂ ຫລວງນ້ຳທາ

ພິທີມອບ-ຮັບໜ້າທີ່ລະຫວ່າງຫົວໜ້າຄະນະໂຄສະນາອົບຮົມເມືອງສິງ ຜູ້ເກົ່າ ແລະ ຜູ້ໃໝ່.

        ໃນຕອນເຊົ້າວັນທີ 13 ຕຸລາ 2023 ຢູ່ທີ່ສະໂມສອນຂອງເມືອງສິງ ໄດ້ຈັດພິທີມອບ-ຮັບໜ້າທີ່ລະຫວ່າງຫົວໜ້າຄະນະໂຄສະນາອົບຮົມເມືອງສິງ ຜູ້ເກົ່າ ແລະ ຜູ້ໃໝ່

ໂດຍເປັນກຽດເຂົ້າຮ່ວມຂອງທ່ານ ສິງໄຊ ວັນຄໍາ ກໍາມະການພັກແຂວງ ຫົວໜ້າຄະນະໂຄສະນາອົບຮົມແຂວງ, ທ່ານ ໜານມອນ ແກ້ວສິງໄຊ ຮອງເລຂາພັກເມືອງ ຜູ້ຊີ້ນຳຂົງເຂດແນວຄິດພັກ-ພະນັກງານ ມີກຳມະການພັກເມືອງ, ຫົວໜ້າຫ້ອງ-ຮອງຫ້ອງການ, ຫົວໜ້າສອງກອງບັນຊາການ ປກຊ-ປກສ ເມືອງ, ຫົວໜ້າ-ຮອງຫົວໜ້າຄະນະໂຄສະນາອົບຮົມເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.ໃນພິທີດັ່ງກ່າວ ທ່ານ ພາຄິນ ທຳມະວົງ ຮອງຫົວໜ້າຄະນະຈັດຕັ້ງເມືອງ ຂື້ນຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກພັກຜ່ອນຮັບນະໂຍບາຍບຳນານ ໃນງວດທີ IV ປີ 2023 ໂດຍອະນຸມັດໃຫ້ທ່ານ ສົມດີ ແກ້ວມະນີວົງ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງ ອອກພັກຜ່ອນຮັບນະໂຍບາຍບຳນານ ເລີ່ມແຕ່ວັນທີ່ 1 ຕຸລາ 2023 ເປັນຕົ້ນໄປ ແລະ ຜ່ານຂໍ້ຕົກລົງ ວ່າດ້ວຍແຕ່ງຕັ້ງວ່າການແທນຫົວໜ້າ ແລະ ຮອງຫົວໜ້າຄະນະໂຄສະນາອົບຮົມເມືອງສິງ ໂດຍແຕ່ງຕັ້ງທ່ານ ນ. ບົວຊ້ອນ ທະນຸງສິງ ຮອງຫົວໜ້າຄະນະໂຄສະນາອົບຮົມເມືອງ ຂື້ນວ່າການແທນຫົວໜ້າຄະນະໂຄສະນາອົບຮົມເມືອງສິງ ແລະ ແຕ່ງຕັ້ງ ທ່ານ ອຳພອນ ຄາຍຄຳ ຫົວໜ້າໜ່ວຍງານຄົ້ນຄ້ວາສັງລວມ ແລະ ຫາງສຽງສັງຄົມຂື້ນວ່າການແທນຮອງຫົວໜ້າຄະນະໂຄສະນາອົບຮົມເມືອງສິງ. ໂອກາດດຽວກັນນີ້ ທ່ານ ສົມດີ ແກ້ວມະນີວົງ ໄດ້ຂື້ນລາໜ້າທີ່ ພ້ອມທັງເຊັນມອບ-ຮັບ ໃຫ້ຜູ້ວ່າການແທນຫົວໜ້າຄະນະໂຄສະນາອົບຮົມເມືອງ ໂດຍຊ່ອງໜ້າຜູ້ເຂົ້າຮ່ວມເພື່ອເປັນສັກຂີພະຍານ.

ຕອນທ້າຍຂອງພິທີທ່ານ ສິງໄຊ ວັນຄຳ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ ແລະ ທ່ານ ໜານມອນ ແກ້ວສິງໄຊ ຮອງເລຂາພັກເມືອງ ຜູ້ຊີ້ນຳຂົງເຂດແນວຄິດພັກ-ພະນັກງານ ໄດ້ໃຫ້ກຽດໂອ້ລົມ ກ່ອນອື່ນ ທັງ 2 ທ່ານ ໄດ້ສະແດງຄວາມຍ້ອງຍໍ, ຊົມເຊີຍ ຕໍ່ຜົນງານຂອງຫົວໜ້າຄະນະໂຄສະນາອົບຮົມເມືອງຍາດມາໄດ້ໃນໄລຍະຜ່ານມາ ພ້ອມທັງຮຽກຮ້ອງໃຫ້ຜູ້ຮັບໜ້າໃໝ່ ຈົ່ງເອົາໃຈໃສ່ໃນການປະຕິບັດໜ້າທີ່ວຽກງານ ຕາມການຈັດຕັ້ງຂັ້ນເທິງມອບໝາຍໃຫ້, ເອົາໃຈໃສ່ສຶກສາອົບຮົມດ້ານການເມືອງ-ນຳພາແນວຄິດ ໃຫ້ແກ່ພະນັກງານ-ລັດຖະກອນ, ມີສະຕິຕໍ່ການຈັດຕັ້ງ ແລະ ພ້ອມທັງເປັນແບບຢ່າງທີ່ດີໃຫ້ແກ່ສັງຄົມ, ເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ກາຍເປັນບຸກຄົນທີ່ມີຄວາມຮູ້ຄວາມສາມາດໃຫ້ສູງຂື້ນ ເພື່ອກາຍເປັນພະນັກງານຊີ້ນຳ-ນຳພາໃນຕໍ່ໜ້າ ເຮັດໃຫ້ເມືອງສິງ ມີຄວາມຮຸ່ງເຮື່ອງສີວິໄລຂື້ນໄປເລື້ອຍໆ.

• < ຕໍ່ໄປ
• ຕໍ່ໄປ >