ຄະນະອານຸກໍາມະການເນື້ອໃນ ກະກຽມສະເຫຼີມສະຫຼອງປີສາມັກຄີ ມິດຕະພາບລາວ-ຫວຽດນາມ ໄດ້ຈັດພິທິໂຄສະນາ-ປາຖະກະຖາ 2 ເອກະສານຢູ່ສະໂມສອນ ວິທະຍາໄລຄູຫຼວງນໍ້າທາ

ລາຍລະອຽດ

ສ້າງຂື້ນເມື່ອ ວັນຈັນ, 01 ສິງຫາ 2022 05:42

ຂຽນໂດຍ ຄອຂ ຫລວງນ້ຳທາ

ຄະນະອານຸກໍາມະການເນື້ອໃນ ກະກຽມສະເຫຼີມສະຫຼອງປີສາມັກຄີ ມິດຕະພາບລາວ-ຫວຽດນາມ ໄດ້ຈັດພິທິໂຄສະນາ-ປາຖະກະຖາ 2 ເອກະສານຢູ່ສະໂມສອນ ວິທະຍາໄລຄູຫຼວງນໍ້າທາ

         ຕອນແລງວັນທີ 24 ມິຖຸນາ 2022 ຄະນະອານຸກໍາມະການເນື້ອໃນ ກະກຽມສະເຫຼີມສະຫຼອງປີສາມັກຄີ

ມິດຕະພາບລາວ-ຫວຽດນາມ ໄດ້ຈັດພິທິໂຄສະນາ-ປາຖະກະຖາ 2 ເອກະສານ ຢູ່ສະໂມສອນ ວິທະຍາໄລຄູຫຼວງນໍ້າທາ ໂດຍເປັນກຽດເຂົ້າຮ່ວມຂອງ ທ່ານ ສຸລິວັນ ທັດສະພອນ ຮອງເລຂາໜ່ວຍພັກ, ຮອງຫົວໜ້າພະແນກການຕ່າງປະເທດແຂວງ, ທ່ານ ນາງ ປານີ ຈິດດາລາ ຮອງຫົວໜ້າພະແນກແຜນການ ແລະ ການລົງທຶນແຂວງ, ຄະນະອານຸກໍາມະການເນື້ອໃນ, ມີຜູ້ອໍານວຍການ, ຮອງອໍານວຍການ, ພ້ອມດ້ວຍຄູ-ອາຈານ, ນັກຮຽນ-ນັກສຶກສາ ມາຈາກວິທະຍາໄລຄູຫຼວງນໍ້າທາ, ໂຮງຮຽນວິຊາຊີບ ແລະ ໂຮງຮຽນຊົນເຜົ່າ ເຂົ້າຮ່ວມທັງໝົດ 201 ຄົນ ຍິງ 162 ຄົນ. ເອກະສານທີ່ນໍາມາເຊື່ອມຊືມໃນຄັ້ງນີ້ ມີ 2 ເອກະສານທີ່ສໍາຄັນຄື: 1. ເອກະສານໂຄສະນາ-ປາຖະກະຖາ ປີສາມັກຄີມິດຕະພາບລາວ-ຫວຽດນາມ ( ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ 18 ກໍລະກົດ 1977 ຫາ 18 ກໍລະກົດ 2022 ແລະ ວັນສ້າງຕັ້ງສາຍພົວພັນການທຸດ ລາວ-ຫວຽດນາມ ຄົບຮອບ 60 ປີ ວັນທີ 5 ກັນຍາ 1962 ຫາ ວັນທີ 5 ກັນຍາ 2022). 2. ວັນເກີດ ປະທານ ສຸພານຸວົງ ຄົບຮອບ 113 ປີ ( 13 ກໍລະກົດ 1909-13 ກໍລະກົດ 2022). ໃນພິທີທີ່ມີຄວາມໝາຍຄວາມສໍາຄັນນີ້ໄດ້ຍົກໃຫ້ເຫັນ ມູນເຊື້ອທີ່ມີມາແຕ່ລະໄລຍະຂອງສອງຊາດລາວ-ຫວຽດນາມ ໄດ້ຄຽງບ່າຄຽງໄຫຼ່ກັນຕໍ່ສູ້ຢ່າງພິລະອາດຫານ, ຜ່ານຜ່າທຸກອຸປະສັກທຸລະກັນດານ ທີ່ເຕັມໄປດ້ວຍຄວາມເສຍສະຫຼະ ແລະ ດ້ວຍຄໍາສອນອະມະຕະຂອງປະທານ ໂຮ່ຈິມິນ ວ່າ “ການຊ່ວຍເຫຼືອເພື່ອນ ປຽບເໝືອນການຊ່ວຍເຫຼືອຕົນເອງ”; ປະຊາຊົນຫວຽດນາມ ແລະ ປະຊາຊົນລາວ ແມ່ນເພື່ອນບ້ານໃກ້ຄຽງ, ອ້າຍນ້ອງອັນໃກ້ຊິດສະໜິດສະໜົມ, ຮ່ວມສູ້ຮົບໃນຂຸມຄອງດຽວກັນ, ຮ່ວມສຸກຮ່ວມທຸກ, ຮ່ວມກັນຮົບ, ພ້ອມກັນເອົາຊະນະ, ນໍ້າໃຈສາມັກຄີສູ້ຮົບ ແລະ ນໍ້າໃຈມິດຕະພາບຖານອ້າຍນ້ອງ ລະຫວ່າງ ປະຊາຊົນສອງປະເທດພວກເຮົາໄດ້ຮັບການຫຼໍ່ຫຼອມຈາກການຕໍ່ສູ້ ແມ່ນປັດໄຈແຫ່ງໄຊຊະນະ ຂອງພາລະກິດຕໍ່ສູ້ກູ້ຊາດ, ແມ່ນພື້ນຖານອັນໝັ້ນແກ່ນ ໃຫ້ແກ່ການພົວພັນຮ່ວມມືຍາວນານ ເພື່ອສ້າງສາປະເທດຊາດ ຕາມຈຸດໝາຍທີ່ພັກໄດ້ກໍານົດໄວ້ ແລະ ເຮັດໃຫ້ລູກຫຼານໄດ້ຮໍ່າຮຽນເອົາຄຸນງາມຄວາມດີ, ພິກໄຫວໃນການການຕໍ່ສູ້ ກອບກູ້ປະເທດຊາດບ້ານເມືອງ, ການດໍາລົງຊີວິດແບບປອດໃສຂາວສະອາດ ຂອງ ປະທານ ສຸພານຸວົງ ເພື່ອມາໜູນໃຊ້ເຂົ້າໃນຊີວິດຕົວຈິງ ແລະ ພິທີດັ່ງກ່າວໄດ້ປິດລົງໃນຕອນດຽວກັນ.

• < ຕໍ່ໄປ
• ຕໍ່ໄປ >