ພິທີ ມອບ - ຮັບໜ້າທີ່ ລະຫວ່າງຜູ້ເກົ່າ ແລະ ຜູ້ໃໝ່ ຂອງຄະນະຈັດຕັ້ງ ແລະ ຄະນະໂຄສະນາອົບຮົມ ເມືອງລອງ ແຂວງຫຼວງນໍ້າທາ.

ລາຍລະອຽດ

ສ້າງຂື້ນເມື່ອ ວັນຈັນ, 01 ສິງຫາ 2022 05:32

ຂຽນໂດຍ ຄອຂ ຫລວງນ້ຳທາ

ພິທີ ມອບ - ຮັບໜ້າທີ່ ລະຫວ່າງຜູ້ເກົ່າ ແລະ ຜູ້ໃໝ່ ຂອງຄະນະຈັດຕັ້ງ ແລະ ຄະນະໂຄສະນາອົບຮົມ ເມືອງລອງ ແຂວງຫຼວງນໍ້າທາ.

    ວັນທີ 15 ກໍລະກົດ 2022 ຢູ່ທີ່ສະໂມສອນເມືອງລອງ ໄດ້ຈັດພິທີມອບ-ຮັບໜ້າທີ່ ລະຫວ່າງຜູ້ເກົ່າ

ແລະ ຜູ້ໃໝ່ຂອງຄະນະຈັດຕັ້ງ ແລະ ຄະນະໂຄສະນາອົບຮົມເມືອງລອງເຂົ້າຮັບບໍານານ, ແຕ່ງຕັ້ງຜູ້ຮັກສາການ ໂດຍການເປັນປະທານຮ່ວມຂອງ ທ່ານ ບຸນຈັນ ສຸດທິປັນຍາ, ກໍາມະການພັກແຂວງ, ເລຂາພັກເມືອງ, ເຈົ້າເມືອງໆລອງ, ທ່ານ ບຸນມາ ພັນດາວົງ ກໍາມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີກໍາມະການປະຈໍາພັກເມືອງ, ຫົວໜ້າຫ້ອງການ-ຮອງຫ້ອງການ ພ້ອມດ້ວຍແຂກຖືກເຊີນ, ພະນັກງານຫຼັກແຫຼ່ງຂອງເມືອງເຂົ້າຮ່ວມຢ່າງພ້ອມພຽງ.ໃນພິທີດັ່ງກ່າວ ທ່ານ ມັງກອນ ສີກັນຍາ ຮອງຫົວໜ້າຄະນະຈັດຕັ້ງເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 255/ຈມ, ລົງວັນທີ 14 ມິຖຸນາ 2022 ວ່າດ້ວຍການແຕ່ງຕັ້ງ ຫົວໜ້າຄະນະຈັດຕັ້ງເມືອງລອງ ເຊີ່ງໄດ້ແຕ່ງຕັ້ງ ທ່ານ ພຸດສະດົງ ອິນຍາວົງ ກໍາມະການພັກເມືອງ, ເລຂາຄະນະພັກຮາກຖານກຸ່ມບ້ານຊຽງກົກ ເປັນຫົວໜ້າຄະນະຈັດຕັ້ງເມືອງລອງ ແລະ ຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການອະນຸມັດໃຫ້ ທ່ານ ນ. ນາງ ສອນສາຍແກ້ວຫົວໜ້າຄະນະໂຄສະນາອົບຮົມເມືອງລອງ ຜັກຜ່ອນຮັບນະໂຍບາຍອຸດໜູນບໍານານ ແລະ ຜ່ານຂໍ້ຕົກລົງ ວ່າດ້ວຍການແຕ່ງຕັ້ງ ທ່ານ ນ. ພອນ ຫຼ້າວົງຄໍາ ຮອງຫົວໜ້າຄະນະໂຄສະນາອົບຮົມເມືອງລອງຂື້ນຮັບໜ້າທີ່ຮັກສາການຫົວໜ້າຄະນະໂຄສະນາອົບຮົມເມືອງລອງ; ຈາກນັ້ນໄດ້ຜ່ານບົດບັນທຶກມອບ-ຮັບໜ້າທີ່ຢ່າງເປັນທາງການ ລະຫວ່າງຫົວໜ້າຄະນະຈັດຕັ້ງ ແລະ ຄະນະໂຄສະນາອົບຮົມເມືອງລອງ ຜູ້ເກົ່າ ແລະ ຜູ້ໃໜ່ ໂດຍຊ່ອງໜ້າກັບຜູ້ເຂົ້າຮ່ວມເປັນສັກຂີພະຍານ.ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມຂອງ ທ່ານ ບຸນຈັນ ສຸດທິປັນຍາ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆລອງ ໂດຍທ່ານ ໄດ້ຍ້ອງຍໍຊົມເຊີຍຕໍ່ຜົນງານທີ່ຜ່ານມາໃນການຊີ້ນໍາໆພາຂອງຫົວໜ້າ ຜູ້ເກົ່າ; ພ້ອມທັງຊີ້ທິດເຍືອງທາງໃຫ້ແກ່ຜູ້ທີ່ຮັບໜ້າທີ່ໃໝ່ ໃຫ້ເອົາໃຈໃສ່ບາງບັນຫາດັ່ງນີ້:

1. ຈົ່ງມີຄວາມຮັບຜິດຊອບຕໍ່ໜ້າທີ່ການເມືອງ-ນໍາພາແນວຄິດໃຫ້ແກ່ພະນັກງານພາຍໃນຂັ້ນຂອງຕົນໃຫ້ກໍາແໜ້ນຕໍ່ແນວທາງນະໂຍບາຍຂອງພັກ-ລັດໃນແຕ່ລະໄລຍະ.

2. ໂຄສະນາປຸກລະດົມໃຫ້ປະຊາຊົນທຸກຊົນຊາດຊົນເຜົ່າເວົ້າລວມເວົ້າສະເພາະແມ່ນພະນັກງານພາຍໃນຫ້ອງການໃຫ້ມີຄວາມສາມັກຄີເປັນປຶກແຜ່ນແໜ້ນໜາ.

3. ຍຶດໜັ້ນຫຼັກການລວມສູນປະຊາທິປະໄຕ, ບຸກຄົນຂື້ນກັບການຈັດຕັ້ງ, ກ້າຄິດ, ກ້າຮັບຜິດຊອບຕໍ່ຜົນໄດ້ຮັບ, ແບ່ງຄວາມຮັບຜິດຊອບໃຫ້ສອດຄ່ອງກັບໜ້າທີ່ວຽກງານ ເພື່ອພັດທະນາອົງການ-ອົງກອນຂອງຕົນໃຫ້ເຂັ້ມແຂງ.

4. ເອົາໃຈໃສ່ສ້າງສາພັດທະນາເມືອງລອງໃຫ້ກ້າວໜ້າຂື້ນກວ່າເກົ່າ; ພິທີດັ່ງກ່າວໄດ້ປິດລົງໃນວັນດຽວກັນ.

• < ຕໍ່ໄປ
• ຕໍ່ໄປ >