ອົງການປະກັນສັງຄົມແຂວງຫຼວງນໍ້າທາລົງເຜີຍແຜ່ວຽກງານປະກັນສັງຄົມ ໃຫ້ແກ່ພະນັກງານພາຍໃນຄະນະໂຄສະນາອົບຮົມແຂວງ.

ລາຍລະອຽດ

ສ້າງຂື້ນເມື່ອ ວັນອັງຄານ, 21 ມີນາ 2023 03:09

ຂຽນໂດຍ ຄອຂ ຫລວງນ້ຳທາ

ອົງການປະກັນສັງຄົມແຂວງຫຼວງນໍ້າທາລົງເຜີຍແຜ່ວຽກງານປະກັນສັງຄົມ ໃຫ້ແກ່ພະນັກງານພາຍໃນຄະນະໂຄສະນາອົບຮົມແຂວງ.

          ວັນທີ 17 ມີນາ 2023 ທີມງານປະກັນສັງຄົມແຂວງຫຼວງນໍ້າທາໄດ້ລົງໂຄສະນາເຜີຍແຜ່ກົດໝາຍວ່າດ້ວຍການປະກັນສັງຄົມ ໃຫ້ແກ່ພະນັກງານພາຍໃນຄະນະໂຄສະນາອົບຮົມແຂວງ ທີ່ຫ້ອງປະຊຸມຂອງຄະນະໂຄສະນາອົບຮົມແຂວງ

ພ້ອມທັງແລກປ່ຽນຖອດຖອນບົດຮຽນ, ຮັບຮູ້ບັນຫາ ແລະ ວິທີທາງແກ້ໄຂໃນຕໍ່ໜ້າ; ເຊິ່ງຈຸດປະສົງຂອງການລົງເຜີຍແຜ່ໃນຄັ້ງນີ້ ກໍ່ເພື່ອແນ່ໃສ່ການສ້າງຄວາມເຂົ້າໃຈກ່ຽວກັບການຈັດຕັ້ງປະຕິບັດວຽກງານປະກັນສັງຄົມ ໂດຍສະເພາະແມ່ນ ພັນທະ ແລະ ສິດຜົນປະໂຫຍດທີ່ຈະໄດ້ຮັບຈາກການເຂົ້າເປັນສະມາຊິກປະກັນສັງຄົມ ໃຫ້ແກ່ພະນັກງານ-ລັດຖະກອນ, ທະຫານ, ຕໍາຫຼວດ, ພະນັກງານໃນຫົວໜ່ວຍວິສາຫະກິດ ແລະ ປະຊາຊົນທົ່ວໄປທີ່ເຂົ້າມາສະໝັກໃຈ ທັງນີ້ກໍ່ເພື່ອຫຼຸດຜ່ອນພາລະຄ່າໃຊ້ຈ່າຍໃນເວລາທີ່ມີການເຈັບເປັນ, ອອກລຸກ, ປ່ວຍການ, ເສຍກໍາລັງແຮງງານ, ເສຍຊີວີິດ ແລະ ການຫວ່າງງານ ນອກນັ້ນຜູ້ປະກັນເວລາຄົບອາຍຸກະສຽນບໍານານ ຍັງຈະໄດ້ຮັບເງິນອຸດໜູນລາຍເດືອນເປັນປົກກະຕິຈາກປະກັນສັງຄົມ ພ້ອມດຽວກັນນັ້ນຍັງຊ່ວຍຫຼຸດຜ່ອນພາລະການແບກຫາບຂອງຜູ້ໃຊ້ແຮງງານ ກໍ່ຄື ນາຍຈ້າງ ໃນເວລາຜູ້ອອກແຮງງານ ຫຼື ພະນັກງານຂອງຕົນ ປະສົບກັບບັນຫາດ້ານສຸຂະພາບ ແລະ ເດືອດຮ້ອນດ້ານຕ່າງໆຕື່ມອີກ. ພິທີດັ່ງກ່າວໄດ້ມີການສົນທະນາແລກປ່ຽນຄໍາຄິດຄໍາເຫັນໃນການຈັດຕັ້ງປະຕິບັດວຽກງານປະກັນສັງຄົມໃນໄລຍະຜ່ານມາ ແລະ ວິທີທາງແກ້ໄຂໃນຕໍ່ໜ້າ ເຮັດໃຫ້ຜູ້ເຂົ້າຮ່ວມມີຄວາມຮັບຮູ້ ເຂົ້າໃຈ ແລະ ເຫັນໄດ້ເຖິງຄວາມສໍາຄັນຂອງວຽກງານດັ່ງກ່າວຫຼາຍຂື້ນ ແລະ ເປັນແນວທາງໃນການພັດທະນາປັບປຸງວຽກງານປະກັນສັງຄົມ ແລະ ການບໍລິການຕ່າງໆໃຫ້ເປັນທີ່ເພິ່ງພໍໃຈແກ່ສັງຄົມນັບມື້ນັບຫຼາຍຂື້ນ.

• ຕໍ່ໄປ >